水草情迷

小妹都同你一樣養草養蝦，要買幾野都幾多，而且亦唔多平，以下是小妹經驗所得，希望對你有幫助

1. 缸
你決定左可以唔洗理，處理方法，買左返黎後，用高濃度鹽水浸1-2日，再用清水清洗
（買缸時要考慮清楚，細缸水質比較難控制；若果一定要買細缸，燈具選擇又要比較小心，１２”缸比較難搵到合適燈具；建議用１０”缸吸取經驗先，買７－１１ｗ夾燈種陰性草同櫻桃蝦都可以好靚）

2. 泥
建議都係用ada 2代 亞瑪遜 幼黑泥係最好，但亦好貴，3L差唔多要$100~120左右，如果想平D可以用 ada 2代 亞瑪遜 粗黑泥，3L約$50-60左右，再自己分大小粒，將大粒放到底，小粒放到面，泥係唔洗清潔
用ADA 2代泥聽講水會清得比1代快，而且無一代咁肥，少許偏酸適合養蝦 <- 錯的話請各大大更正
（如果唔講究的話，平平地用　ＡＤＡ　２代粗粒都可以，只是觀感上比例較大，無咁肥易控制　ｄ）

3. 基肥
其實呢個視乎你種乜野草，要插泥的草，最好放基肥，唔係入泥的水草，則可以考慮用水草肥液，當然基肥唔係萬能，所以你亦可能需要買一D唔同益養的水草肥液，如鐵肥、綜合肥液等等，小妹就買左基肥$45一包，水草綜合肥液細支$25

4. 過瀘器
最主要係養菌、過濾污物、打氣(呢個視乎你點樣安裝出水位而定)，令水質適合種草養蝦；
有2種最多細型缸用的過濾器，簡單系：掛濾 - 體積比較細，安裝方便，但養菌量及過濾能力量比之後所講的差，複雜系：濾桶 - 體積比較大，安裝時需要有一定空間，但養菌量及過濾能力比掛濾好平價濾桶如Resun 日生仿501迷你濾桶 CY-20 或 Boyu 仿501迷你濾桶 EF-05，都適合小缸用，內有生物環(養菌用)、過濾棉(隔垃圾)、活性炭粒(淨水用)，價錢約$80-120左右，注意取電插頭，平價的可能是大陸2腳，買時問清楚...(小妹我因為無乜錢所以買左平價的2腳，自己再買一個3腳頭換，當然你唔識換頭則可以買個旅行插頭用$5-8)
（日生　ＣＹ－２０幾好，又唔係貴得過質素好少少的掛濾幾多，不過我１２”方缸都覺得水流有少少大，可以除去雨淋管尾端的膠塞分散水力）

5. 氣泵
這個未必一定要，視乎自己而定，小妹就有買，$30~60左右，留意取電插頭，有D貨是大陸2腳
（我都無用，有草都應該夠，如果真係怕唔夠氧氣，可以將雨淋管放置高過水面，不過會有水聲，建議新開缸時使用，幫助養菌）

6. 夾燈
燈的火數要視乎個缸的水量而定，計算方法：1公升水等於1W火數，約$70起

7. 計時器
因燈其實不能長期著住，所以要用計時器黎控制著燈時間，平平地$35有個，小妹就買左一個約$40

8. 5位拖板
呢個唔洗講就係比你用黎插D燈呀、濾桶、氣泵、風扇等，其實有時5位都未必夠用，所以自己決定，約$60-100

9. 水草夾及水草剪
呢2個小妹覺得係必要品黎，由其係水草夾用黎插草等

10. 換水用的泵....(唔記得個正名係乜)
換水用，小妹都係覺得呢個係必要的，但買時要黎意...有D抽水泵真係唔係好好用..... 小妹買左個細小橙色的$10抽水泵....用極都抽唔到水出黎....
（細缸用的泵我都唔係好識用，應該係用虹吸原理．．．．我用大缸的換水，係比較麻煩）

11. 硝化菌
呢個一定要買，D硝化菌係好有用，在淨水及養蝦方面，可以買活性硝化菌(發揮功能時間快，但亦短，每次換水後都要再落)，粉類休眠狀的硝化菌(發揮功能時間慢，但效能維持時間比較活性的長，但點用小妹未用過唔知)
（去卡ｘ買一支好似叫　ＢＩＯ　咩咩的　＄８的硝化菌（細細支玻璃管咁既）已經夠晒，　好似話一支　ｆｏｒ　２４”都夠，我開左缸之後都無加過；同埋唔好一次加咁多生物，細缸建議１０隻內）
　
12. 氣喉、接喉咀、氣石、細化器、止流閥、小吸盤、過濾棉、生物環，總知係所有雜項都計算~
視乎需要而買...但小妹都係覺唔多唔少都要買，因為自制CO2一定會用到，小妹約花了不少錢...買過$30氣喉(有粗有幼)、1個玻璃細化器$35、1個普通細化器(因自制CO2唔夠壓力推玻璃個個所以要另買)$13、直/L型接喉咀多個(超過10個有平有貴，有D仲要係電腦水冷用的接喉頭約$15起1個，買左幾個….)、多個大少不同的吸盤…總知要就買…會用唔少錢係呢D野度
另外如果你要自制CO2，還要有水樽、小鑽(鑽孔用)、剪刀、糖、乾依士等等
及如要做景，可能仲要買石及買沈木等，買沈木又要買煲煲舊木，石個D都唔平成幾十蚊一磅，所以雜項係一筆大數目黎
另可能仲要買個層架黎用…(小妹就係無櫃可以放缸要另買一個小型活動架用，$99)

（初頭好多配件已經跟你的器材有埋，唔一定要額外配置，唔夠先再買，慢慢會知道有咩要加，種陰草都可以唔用ｃｏ２）

所以最好預算唔好少過1千蚊…….(可能我樣樣都要買…所以開一個9吋缸，買草買蝦買其他野，上面D野咁….已經用左超過1千大完了…仲要不停咁增加中)


以上我所講的大約＄３００～＄４００可以買到，當然唔計你　ｄ　蝦同草，要貴的真係可以好貴

有漏或有錯誤，請其他大大補回及更正 (me too)

　

以上愚見希望幫到你啦，仲有．．．．．當你愛上水族之後又係另一回事

去卡X買係咁嫁！我上次星期六去到勁多人，問佢有無一代黑泥，答：「最入邊，自己睇下…」…
問：「個袋上面無印 II 字係唔係一代泥呀？」答：「有 II 字即係二代…」…
問：「有邊隻沙無咁影響 ph 值呀？」答：「依到 d 沙全部都唔影響個喎…」…
結果都係自己簡完俾錢走…
不過佢真係平其它一節，以你要求成套買哂都唔貴

首先你想養咩蝦先？
如果養水晶蝦就必定要水冷先得，無就唔洗諗，而且細缸比較難控制，器材補品亦會多好多，通常要用泥底養
如養櫻桃蝦、藍蝦等易養的品種用掛濾加風扇就得，用泥用沙底都得，唔洗氣泵，有濾水就得
打算買10"缸的話，可留意10"x10"x10"方角缸(好似$3x)，幾抵玩，size比你預期大少少
初玩可種陰草(水榕/莫絲)+櫻桃蝦，器材可以簡單一D，櫻桃蝦又熱得又易繁殖
魚缸$3x+掛濾$70-90或濾桶$200+夾燈$100+黑鋼沙大約$35-45(5kg)+陰草+沉木$100+櫻桃蝦$10x6隻
=$400-$500
只供參考

多謝您的提供, 我只喺新丁一名,當然會買啲容易種同養的品種,
黑鋼沙喺咩牌子同响卡X有冇, 唔喺用ADA黑泥咩.......

LILY

點解我用黑鋼沙呢？
因為反缸可洗乾淨再用，如種草可在沙底加基肥，我在升x買的
櫻桃蝦非常易養，你好快會做爺爺