水草情迷

開左個珊瑚缸約 2 年, 最近一次旅行回來, 由於旅行期間有生物死左無人處理, 水質急速變壞幾乎反缸.
最近工作開始忙, 而且間中會去下旅行 (幾日唔睇得), 咸缸可能唔太適合.
但自己又鐘意想養魚, 想考慮下轉玩淡水既可行性.

家陣用緊既滴漏缸, 是連櫃訂造, 喉管固定了, 應該不可能轉用濾桶.
唔知有無人試過用滴漏缸玩草. 有乜野地方要注意?

魚缸既呎吋:
- 48 x 18 x 22 滴漏缸 (側邊三角滴漏糟, 上下入水)
- 36 x 15 x 18 沙缸 (分三倉, 每倉約 10 吋)

上水泵到出水口約 3000L, 對草缸來說, 會唔會太大水流? 考慮改成長條雨淋管圍住缸頂出水.

沙缸方面, 由於之前養珊瑚, 無用棉同環, 頭二倉打通的, 中間有生物棉隔開.
準備在頭倉加個棉箱 (自己造), 再加一大袋環.
二倉原設定係草缸, 轉為淡水草缸.
尾倉裝鈦壺同上水泵, 應該唔會點改, 仲有1/4既空位有需要再加環或其他設備.
唔知咁樣 set 好唔好?

之前都同朋友諗過, 化氮在淡水缸唔知打唔打到野, 所以可能初期會試下照用番. 真係打唔到野至賣比人.


唔該哂大家先, 日後可能仲有更多問題.

種草要打co2，滴漏缸會走晒啲co2，放棄個沙缸啦。
主缸可以用返，封咗滴漏糟落水位，或者睇吓可唔可以改為濾桶入水位
化氮喺淡水肯定打唔到野，出讓啦

_________________
我係積及

種草好要心機架,你又無時間.
一不留神生藻生都你無心機.
不如養下金魚啦,唔使點煩.
又唔使買過d工具.

唔該哂兩位 c 兄.

想了解一下, 點解滴漏缸會走哂 CO2 既? 係咪因為要 keep 住 CO2 要比較靜止既水?
想用番沙缸, 其中一個原因係個鈦壺改唔走, 如果唔用沙缸, 就等於連水冷都無 (部分體機係除缸櫃外最貴的設備了). 而且, 個沙缸在櫃內, 中間有支主力柱阻住, 出唔到黎 (要拆走支柱, 先要搬走個主缸, 極大工程). 所以, 櫃內都好難再裝濾桶.

另外, 想問問草缸既打理.
其實平日只要我在香港, 每晚我都會抽時間打理個缸的 (已經習慣了, 忙都唔會唔理), 只係有時會出外幾日 (一年最多三次, 每次都唔過一星期), 會有幾日掂唔到個缸.
因為之前有個 friend 都係玩草缸既, 佢同樣都會需要出外, 佢同我講間中睇少姆 日都 ok 既. 所以我至諗住轉草.

如果我可以 keep 住同家陣一樣, 每日都照顧個缸, 一年可能會有三次外出, 問題大唔大呢?
之前我個 RT 都試過外出的, 一直都無事. 只係今次有生物死左, 幾日無人理至出事, 角比較易受影響, 水質一變佢地又好易死, 連鎖反應.
我初時以為草缸既魚仔多是細魚 (例如燈魚), 就算死左一兩條唔發現, 對個缸既影響無咁大, 以為唔會發生同樣既事.

或者, 如果真係要 keep 住日日打理, 停幾日都唔可以. 我可能要同家人商量下, 轉養金魚了.

主要係滴漏糟落水位會增氧同令 co2 流失 只要開大 CO2你有PH CONTROLLER keep住就冇問題

沙缸只要用生化棉濾走落水位D大片水草後面全用環 OK

化氮喺淡水肯定打唔到野，出讓啦

咁大個缸上水泵 3000L OK la 可以將條雨淋管出水孔開多d同大孔d就 ok

你應該用開 400w HQI 咁勁好容易爆藻要小心D

_________________

唔該哂 c 兄既解釋.

pH 我只有錶, 唔係 Controller, 可能要考慮換個 controller 了.
如果可以靠加大 CO2 補充, 當行定左之後, 水流不變的話, 應該可以固定左某個 CO2 既份量而達到原來既效果. 不過, 可能會浪費好多 CO2. 最多出氣口盡量遠離滴漏糟, 等佢地無咁快去到果邊.

燈方面, 由於我水位唔深, 之前都係深水角, 唔想煲水, 所以無用 HQI.
家陣用緊 4xVHO + 2xT5HO (不過, 加埋大過 400W), VHO 同 T5HO 係獨立開關, 可以分開黎開.

化氮用唔番都唔緊要, 之前都有人同我講過, 淡水既表面張力唔夠, 起唔到泡, 打唔到野的. 我只係貪玩想試.

不過, 我比較 concern 係如果突然有 5-7日無人打理, 會唔會好易出事?
大家平時會唔會話成家人出去旅行而完全無人打理的? 大家會點樣準備呢?

草缸如果無超養可以一星期先餵一次

燈同CO2用時間制開關唔洗理

反而你要小心滴漏會令水位大量蒸發

我而家只係間中加水同剪下草根本不用打理

_________________

唔該哂 c 兄.
聽完 c 兄咁講, 我又放心番好多了.

燈我一直都用緊時間制, 應該唔係大問題.
水位蒸發應該唔怕, 沙缸既水位, 扣除回流安全位既最高點, 夏天都一個月唔加水都唔會去到水泵位. 一個星期絕對唔會有事, 呢樣之前去旅行試左好多次了. 我一直都唔駛 set 自動加水. 而且, 淡水唔會因為蒸發而改變咸度, 應該比家陣更安全.

不過, 我都唔會話太懶唔理佢地的, 只要我一有機會就會嘗試執好個缸. 反而之前成日比咸缸既 c兄話我成日攪住個缸, 叫我唔好理咁多.
所以,我只係怕自己不在香港, 打理唔到既時候佢地會出事.

照家陣咁睇可以同家陣再 confirm 乜野時候適合, 搵個假期清左個缸準備.

另外想問多樣, 我家陣用緊 RO 水 玩 RT 的, 咸水因為好多野開鹽時會補充番. 但係, 唔知淡水用 RO 好唔好, 會唔會失去左好多水中既元素?

水草缸不用RO水了

有 c 兄會用水桶將水喉水,用氣泵打氣令氯氣分解養一晚水先落缸,我就直接開水喉落缸多年來都冇事

_________________

oh...咁我 set RO 又可以考慮出讓了.

不過, 我果區 d 水勁差, 食水喉一定要加慮水器的, 否則 d 水有時就咁肉眼都見污糟, 水喉水 TDS 一直都 60 以上的.
所以當初至由 DI 轉埋 RO.

唔知, 如果照用番 RO, 會唔會有不良影響 (除左浪費好多水)?

我唔知RO水 ph係幾多草缸ph 6-6.5就 ok

_________________

用工業用co2打大co2 la
3000L唔會太大姐
化氮沒用

_________________
與你的朋友分享水族樂趣

co2果度...買個靚o的o既溶解器基本上無問題架喇~
我都識有o的魚友用滴漏缸種水草...唔覺有問題~

_________________
http://www.aqugrass.com/phpBB2/viewtopic.php?t=39365
我的魚缸資料(2008-5-13更新)

唔該哂大家, 設備上應該 ok 了.
今日已經網上平價放哂 d 咸野, 準備過兩日洗缸轉淡.

但係, 今日好多魚友同我講, d草生得好快既, 要成日剪草, 過一排唔剪, 隨時變垃圾缸.
同埋, 用泥既缸會好易污糟.

唔知大家通常幾耐要剪草一次呢? 同埋點處理缸底既污糟野的?

環景好草自然生快

幾耐要剪草一次就好睇你草種

上去睇睇--> http://www.leoaqua.com/gallery.html

我現在一個月才輕微修剪一下

新手識而用泥種草ph比較易控制紅色水草會比較红

用沙種太陽草同紅色水草難好多

泥底一至兩年就要換

沙做底牀要比較長時間才能成熟泥會快好多

沙同泥底都會有大量沉澱物的

_________________